Цэргийн зарлан буюу ҮХЛИЙН ЗАРЛАН

Дорноговь аймаг, Зүүнбаян сум

Цэрэгт явснаас амиа хорлох нь хавьгүй дээр сонголт. Миний энэ зүйрлэлийг уншаад зэвүү, дургүй хоёр нь зэрэг хөдлөх хүмүүс олон. Цэргийн алба бол эр хүний бие бялдрыг тэгш хөгжүүлэх, хүн ёсоор хүмүүжүүлэх тийм л нэр хүндтэй зүйл. Өө энэ өгүүлбэр бас л худлаа юм байна. Зүгээр л ингэж ярих ёстой юм шиг байсан. Харин миний тодорхойлолт бол "Их сургуулиа төгсөхдөө эсвэл орохоосоо өмнө нэг жилийг сохор зоосны цалингүйгээр хүнд дасгал хөдөлгөөн хийж, олон даргын зараалд гүйж, нийгмийн бүтээн байгуулалтад оролцоод дараа нь зодуулснаа эр хүн боллоо гэж дүгнээд, батлах шаардлага гарвал даргадаа зодуулж, эсвэл хүнд дасгалаа даалгүй мажийхыг хэлж байх шиг байна." 21 настай надад нэг удаа цэргийн зарлан ирсэн юм. Би ч оюутан учраас угаасаа явахгүйгээ мэдэж байсан. Явахаар боллоо ч манай гэрийнхэн явуулахгүй нь ойлгомжтой. Учир нь манай аав цагдаа, цэргээр олон жил явсан учраас ямар харгис зүйл хүлээж байгааг мэднэ. ( Ижий минь өнөөдөр хайрлаж өсгөсөн хүүхэд үхэл рүү нь юу гэж явуулах вэ? Гэж хэлэв). Гэхдээ цэргийн үзлэгт орохдоо би баярлаж, догдолж орсон юм шүү. Олон зуун мянган төгрөг өгөөд орох шинжилгээг тэнд үнэгүй өгдөг учраас түүнийг боломж л гэж харсан хэрэг. Заал дүүрэн эмч нар тус тусын шинжилгээг шалдан залуусаас авдаг. Гэхдээ нэг асуулт асуугаад эрүүл гээд явуулах эмч байхад сэтгэлээсээ нэгд нэггүй үзэх эмч бас байна. Жишээ нь мэдрэлийн эмч: "Шивээс хийлгэсэн үү?" би: "Хийлгээгүй" за яв эрүүл гэх жишээний. Үүнээс үзэхэд шивээстэй Монгол хүн бүр МЭДРЭЛ НЬ МУУТАЙ гэж дүгнэж болохуйц байх. Харин эрчүүдийн эмч бол сайн үзнэ ээ. "дээшээ, доошоо, шамла суу бос ... гээд л" Тиймдээ ч үнэн дүгнэлт гарч дүгнэлт нь нийгмийг цочроосон байх. Түрүү булчирхайны өвчлөл нийгмийг цочроосныг сана !!! За эмчийн үзлэг бол хийгдээд л дуусдаг зүйл. 

Тэнд байх залуучуудыг харвал хэт тураалтай, хэт таргалалттай хүмүүс олон. Бас цэрэгт явж хүмүүжээсэй гэж бодсон хүмүүс ч олон байв (Нэг өгүүлбэрт ашиглах бүх үгсийг хараалын үгээр ярьж чадаж буй тэднийг геннист бичүүлмээр). 

За гарчгийнхаа талаар тайлбарлавал: Сүүлийн 2 жилийн хугацаанд миний мэдэхийн 2 цэрэг үхэв. Өөд болох үхэх гэдэг үг ойролцоо боловч сонсогдохдоо бага зэрэг ялгаатай. Тэд үхсэн. ЦЭРГИЙН АЛБАНД ЦОО ЭРҮҮЛ ХҮН ТЭНЦДЭГ. Эмчийн үзлэг болж байгаа юм чинь тэд хоёул цоо эрүүл л байсан байж таараа. Бас нэг хачирхалтай зүйл нь хоёул Дорноговь аймгийн Зүүнбаян суманд үхсэн. Энд миний мэдэх маш олон хүнд ажилладгаас гадна цэргийн алба хаасан. Бас ямар аймшигтай харгислалууд байдгийг хүмүүсээс зөндөө л сонссон. Шүдэнзний мод уу? Лоом уу? Гэдэг 2 асуултаас л эхэлнэ. Лоом бол нэг цохино. Шүдэнз бол хөдөлж чадахгүй болтол чинь тамлан зовооно. Цэргүүд лоомыг л сонгоно. Ганц Зүүнбаян ч биш, бүх цэргийн штаб !!! Энэ мэтээс л тамлал эхэлнэ. Хэрвээ та тэнд цэргийн алба хаасан нэг хүнтэй 10 минут ярих юм бол өөрөө амаа ангайна, бас амиа хорломоор ч санагдах биз. Амиа хорлох энэ үг тоглоом биш шүү. Монгол улс Азидаа байтугай дэлхийд амиа хорлолтоороо тэргүүлдэг гэдгийг санаарай. Гэхдээ жинхэнээсээ амиа хорлодог үгүйг нь би бас таашгүй. Илрээгүй хэргийг, хахуулиар шийдсэн хэргийг, эзэн нь олдохгүй байгаа хэргийг, эсвэл цагдаа нар өөрсдийгөө хамгаалсан хэргийг амиа хорлолт гэж бүртгэж байгааг ч би таашгүй. Монголд айдасгүй явна гэдэг чинь баячуудын л ажил байх. Тэд ч айдаг л юм шиг байсан. Солонгос сериалаас илүү адал явдалтай учир хааяа сонсоод авдаг юм. Хүрэлсүхийг Номтойбаяр алчих вий? Энхболдыг Батзандан буудаж унагаах вий гэдэг дээр ч айдаг л байх. Ер нь айдасгүй хүн гэж нэг ч байхгүй. Байрныхаа орцод дээрэмдүүлсэн хэрэг гарахад дээрэмдсэн хүнийг нь 1 сар л хорих шийдвэр гаргадаг тийм л улс. Үнэн худал нь мэдэгдэхгүй мэдээллүүд тавигдах л юм. Тэрнээс хүртэл айдсыг мэдрэх юм. ЛГБТ жагсаалд оролцсон миний зургийн доор буудаж унагаа гэсэн коммэнтийн доор өөрийн байгаа газрыг би хэлтэл одоо хүртэл буудаагүй байхыг бодвол айлгаж байгаад алахаар шийдсэн байх.  1/22-нд цэрэг үхлээ гэсэн мэдээг сонсоод миний зүрх зогсох шахсан. Би цэрэг болохоос айдаг, цэрэгт явахаар бол замдаа хэлээ хазаж үхнэ гэж боддог над шиг хүний зүрх цэргийн штабт очихоосоо өмнө л зогсох шахлаа. 4 сард ирэх ҮХЛИЙН ЗАРЛАН минь АМИА ХОРЛОЛТЫН зарлан байх вий дээ. Уг нь цэргийн зарлан. Хүн намайг алсан ч, замдаа осолдсон ч, дарга нар маань тамалсан ч, зодсон ч эцсийн шийдвэр нь эх орноосоо урвасан буюу амиа хорлолт эсвэл зуурдаар таалал төгссөн гэсэн шийдвэр байх болов уу. Намайг үхсэний дараа шуугих хүмүүст хүүхдээ цэрэгт бүү явуулаарай. 

САЙН БАЙНА УУ? Цэргийн хуаран гэх оршуулгын газар минь.